தமிழ்நாடு ரேசன் கடைகளில் 4000 வேலை - விரைவில் அறிவிப்பு

ரேஷன் கடைகளில் விற்பனையாளர், எடையாளர் பணிகளுக்கு, 4,000 ஊழியர்களை நியமனம் செய்வதற்கான தேர்வு அறிவிப்பை, கூட்டுறவு துறை விரைவில் வெளியிட உள்ளது.

தமிழகத்தில் கூட்டுறவு துறையின் கீழ் 33 ஆயிரம் ரேஷன் கடைகள் நடத்தப்படுகின்றன. அவற்றில் விற்பனையாளர், எடையாளர் பதவிகளில், 25 ஆயிரம் பேர் பணிபுரிகின்றனர்.

ஊழியர் பற்றாக்குறையால் ஒரே நபர் இரண்டு, மூன்று கடைகளை கூடுதலாக கவனிக்கிறார். அதிக பணிச்சுமையால் ஊழியர்கள் சிரமப்படுகின்றனர்.

இதனால், ஒவ்வொரு மாவட்டத்திலும் ரேஷன் கடைகளில் உள்ள காலியிடங்களுக்கு ஏற்ப, 100 – 200 பேரை நியமிக்க மாவட்ட ஆள்சேர்ப்பு நிலையங்கள் வாயிலாக, 2020 – 21ல் அறிவிப்பு வெளியிடப்பட்டது.

விண்ணப்பதாரர்களிடம் நேர்காணல் நடத்தி பணியாட்கள் தேர்வு செய்யப்பட இருந்தனர். ஆள்சேர்ப்பு நிலையங்கள், கூட்டுறவு துறை கட்டுப்பாட்டில் இருப்பதால், ரேஷனில் வேலை வாங்கி தருவதாக முறைகேடுகள் நடந்தன.

அதிக புகார்கள் எழுந்த நிலையில், நேர்காணல் முடிந்த நிலையில், தேர்வானவர்களின் பட்டியல் வெளியிடப்படவில்லை. பின், 2021ல் ஆட்சி மாற்றம் ஏற்பட்டது.

இதையடுத்து, ‘3,331 விற்பனையாளர்கள், 666 எடையாளர்கள் பணி இடங்களை நிரப்ப ஏற்கனவே வெளியிட்ட அறிவிப்பு ரத்து செய்யப்படும். மாவட்ட வேலை வாய்ப்பு அலுவலகம் வாயிலாக பட்டியல் பெற்று, பணி நியமனம் மேற்கொள்ளப்படும்’ என அறிவிக்கப்பட்டது.

கொரோனா மூன்றாம் அலையால் ஊழியர்களை பணி நியமனம் செய்ய கால தாமதம் ஏற்பட்டு வந்தது.

இதுகுறித்து, கூட்டுறவு துறை அதிகாரி ஒருவர் கூறுகையில், ‘ரேஷன் ஊழியர்கள் தேர்வை வெளிப்படையான முறையில் நடத்த அனைத்து ஏற்பாடுகளும் செய்யப்பட்டு வருகின்றன. இதற்கான அறிவிப்பு விரைவில் வெளியாகும்’ என்றார்.

விரைவில் வெளியாகும் இந்த வாய்ப்பை பயன்படுத்திக் கொள்ளுமாறு அறிவுறுத்தப்படுகிறார்கள். இந்த வேலைக்கு எட்டாம் வகுப்பு, பத்தாம் வகுப்பு, பனிரெண்டாம் வகுப்பு படித்திருந்தால் போதுமானது. இந்த மகிழ்ச்சியான தகவலை உங்கள் நண்பருக்கும் மற்ற க்ரூப்களுக்கும் ஷேர் செய்யுங்கள். யாரேனும் ஒருவருக்கு பயன்படலாம். நன்றி!